'ജോസഫ് മാഷിന്റെ കൈ വെട്ടിയപ്പോള്‍ ഹക്കീം ഫൈസി അനുയായികള്‍ ലഡു വിതരണം നടത്തി': സലാം ബാഖവി

തിരുവനന്തപുരം: മുസ്‌ലിം ലീ​ഗിന്റെ നിയന്ത്രണത്തിലുളള വാഫി കോളേജുകൾക്കെതിരെ സമസ്ത മുശാവറ അം​ഗം അബ്ദുൽ സലാം ബാഖവി. കോഡിനേഷൻ ഓഫ് ഇസ്‌ലാമിക്‌ കോളേജസിൻ്റെ(സിഐസി) സെക്രട്ടറി അബ്ദുൽ ഹക്കീം ഫൈസി ആദൃശ്ശേരിയുടെ അനുയായികൾക്ക് എതിരെയാണ് വിമർശനം. ജോസഫ് മാഷിന്റെ കൈ വെട്ടിയപ്പോൾ ഹക്കീം ഫൈസിയുടെ അനുയായികൾ ലഡു വിതരണം നടത്തിയെന്നാണ് വിമർശനം. ജമാഅത്തെ ആശയങ്ങളാണ് വാഫി കോളേജുകളിൽ പ്രചരിക്കുന്നതെന്നും സുന്നി ആദർശന സമ്മേളനത്തിൽ സലാം ബാഖവി ആരോപിച്ചു.

2010 ജൂലൈ നാലിന് പൂക്കിപ്പറമ്പ് ഹൈദ്രോസ് സ്മാരക വാഫി കോളേജിൽ ഒരു ലഡു വിതരണം നടന്നുവെന്ന് സലാം ബാഖവി പറഞ്ഞു. ചരിത്രം പരിശോധിച്ചാൽ എന്തിനാണ് ആ ലഡു വിതരണം നടന്നതെന്ന് മനസിലാക്കാൻ കഴിയുമെന്നും അദ്ദേഹം പറഞ്ഞു. പൂക്കിപ്പറമ്പ് ഹൈദ്രോസ് സ്മാരക വാഫി കോളജിലെ പ്രിൻസിപ്പൽ, ഹക്കീം ഫൈസിയുടെ വലംകൈ അല്ലേയെന്നും സലാം ബാഖവി ചോ​ദിച്ചു.

സലാം ബാഖവിയുടെ വാക്കുകൾ വലിയ വിമർശനങ്ങൾക്ക് വഴിയൊരുക്കിയിരിക്കുകയാണ്.

സമസ്തയിലെ ലീ​ഗ് വിരുദ്ധ ചേരിയുടെ വക്താവായിട്ടുളള നേതാവാണ് സലാം ബാഖവി. സമസ്തയുടെ പുതിയതായി രൂപികരിച്ച വിദ്യാഭ്യാസ കോളേജുകളുടെ ചുമതലയുളള മുശാവറ അം​ഗം കൂടിയാണ് സലാം ബാഖവി.

Content Highlights: Salam Baqavi says that, Wafi colleges propagate Jamaat ideas